السبت المقدس الحلقة 13
الحلقة 13
تحت طلب إهداء خاص ...سبت بطعم أخر...لي باغي يطلعها و يضحك و يشد ستون كيف ديما مع باقي سبوتة لي سبقو...هذا سبت غير صالح ليه..
أجمل ما في بو العالم ، هو داك الاحساس الرباني لي كيجمع بين بنت و ولد ، داك الحب طبيعي متدفق فحال حمم البركان و صهارة لافا ، حتى حاجة ما كتقد توقف قدامو ، داك لحب ليكتولد من رحم معاناة جهاد صراع ذات صراع مجتمع عائلة و تقاليد و ظروف ...حيد عليا من داك كليشي لحامض ديال هابط في دروج و هي طالعة و تسطحتي معاها ..طيحتي ليها لكتوبة هبط تجمع معاها...جات عينك في عينها طلعت أغنية ديال لو حبنا غلطة....
لأن الحياة ميشي كيكة عندنا مقادير في ورقة نصيبوها ...حتى كيكة وخا مقادير ظروف مناسبة بزاف مرات ما كتصدقش...هكاك حياة حب بين إنسانة و إنسان جمع بينتهم إحساس مستحيل يتوصف حيث مقدس ...لكن لحكمة عند الله تعالى ..بعدة فترة من تورط ديالهم في علاقة حب مجنونة بكل مقاييس..... على غفلة مرضت هي.. مشات تشوف اش عندها ...لقات ان عندها سرطان ورم في دماغ في بداية ديالو ...
هنا كتوقف دقات لقلب ...كتجمد الاحاسيس...حتى عقارب ساعة كترجع للوراء ...داء لعين ....انتما يا الله في بداية ...كتبغيها كتبغيك لحد أنك ما كتشوفش لحياة بلا بيها هي بالمثل ....بطبيعة المرأة بحكم قصص و واقع مجتمع ...كتبدا تشوف حياتها انتهت ..أنك ميشي ملزم تبقى معاها ...أن كل شي غادي ينتهي كيف ما بغى سرطان ....
هنا كتوقف في مفترق طرق كتجلس مع راسك ...أنت بغتي هذا لبنت صحيحة ...هي دابا مريضة ميشي اي مرض ...كان ممكن تكون انت لمريض ..تقلب الاية ....كتجلس تفكر احاسيسكم و مشاعركم احلامكم مغامرتكم و تضحياتكم...و تضحيات ديالكم ...
تفكرت اول لقاء كيفاش أغمي عليها من شافتك كيفاش رقيقة وحساسة...كيفاش بكات على كتفك كيفاش ابتسمت لك في وجهك...كيفاش مارست معاك قدسية سبت...و كيفاش غيرت لك نظرتك للمرأة ...بدلت فيك بزاف حويج مقودين خلاتك تشوف لحياة بمنظور اخر ... فجأة كنتوض و دموع في عينك كتهز صورتها كتبوسها و كأنها هي لقدامك....
كتقرر ترفع تحدي أنت وياها هي معركتنا بجوج و الله معانا ....خاصها دير عملية في أقرب وقت ...كلشي حاول معاها عائلتها صحبتها....كلشي عارف أن لا أحد في العالم ممكن يقنعها الا أنت....كتقرر دوي معاها تخد بيدها و ترجع ليها ثقة في راسها ...ميشي عطف أو شفقة لا أبدا حب و وفاء و تضحية و عشق لأقصى حد.....
حمد لله كان كشف مبكر هي بقى صغيرة 18 سنة ....ما خلتهاش تفكر في أي حاجة من ديك صورة لخيبة لكيرسمها مجتمع متخلف للمريض بسرطان ...لي أغلبهم ما كيقهرهمش لمرض بقدر ما كيقهرهم عامل نفسي نظرة مجتمع ليهم أنهم صافي انتهت حياتهم ...عامل نفسي هو 95 مئة من نجاح و عامل اساسي في شفاء......ايييبيييه طاح شعر ضعافيتي...فين هو مشكل كلشي كيتخلف يرجع ...لكن الى طاحت مشاعرنا و احاسيسنا صعيب رجعوها...
مارستو سبت مقدس ..بعنف و جنون وحب ...و كأنكم درتوا ثورة على مرض ...نتزعتيها من وسط الشك و الالم ...رجعتها أقوى امرأة فب العالم ...خرجت منها أنوثها ...دفعت بيها لحد الوصول لليقين في الايمان بحبكم .....خلتها بغى دير عملية يوم قبل غدا ...صلاة و دعات حست أن الله معاها ...و أنت و الكل بجنبها ...خاص تنجح و تحدى ...من أجل نفسها أحلامها أمالها ...من أجل والديها ...من أجلك أنت ....من أجل سبوتة المقدسة لي دازو لي مازال في الانتظار ...من أجل الحياة لانها تستحق...
نجحت عملية...انتزعت فرصتها في الحياة بكل شجاعة ...شكون لي قال أننا لا نعيش و لا نحيى بالحب ...الحب هو الحياة و الحياة هي الحب ......خد بيدها في طريق شفاء ...حبهم زاد كبر ..حتى حاجة ما قدرت تمنعهم......طلع معاها ولد ناس ...صدقت معاه إمرأة ونص...
دراري دريات ...أحبوا بصدق أو إرحلوا ...ميشي أي واحد مرض أو مرضت يعني صافي ما بقاش صالح ....راه دنيا كدور مرة عليك و مرة على الاخر محدنا على قيد لحياة راه حنا عرض لأي لعبة ما كنتيش تخيلها ....شحال من واحد كان مرض ضحات معاه البنت حتى رجع كيف ما كان ما تخلاتش عليه ...وشحال من وحدة مرضت في وقت كلشي يأس وتخلى عليها لقات فقط داك لي بغات في جنبها ما تخلاش عليها دار مستحيل ....تقولوا ليا ما يمكنش في زمن ديالنا .....لا راه يمكن بجهد غير حنا فقدنا ثقة حيث كنشوفوا كنسمعوا غير قصص خيبة و سلبية فتكون عندنا قناعة زائفة ديال راسي أ راسي من بعد يموت لي يموت .....لدرجة أن يقدر يجي داء سكري لي هو مرض عادي ....و تقلب عليك أو تقلب عليها ..وتنهي علاقتكم بسبب جرعة أنسولين.....
0 التعليقات: