السبت المقدس الحلقة 19
الحلقة 19 ...
ساعة تشير لديك 9 صباح ...الغوت بجبهد داخل من شرجم و لوح كورة ...صفارة كوكوط ديال جيارن تا هي كتعزف سنفونية بضبط كوكوط ديال مرت المقدم ماشي مقدم ديال دروة هههه صفارتها عندها صوت خاص جدا ...كدور وجهك لا حبيبة حداك لا حتى لعبة ...ما كاين ما تبوس ما تعنق...كتنوض على وعدك كتوقف كتهز عينك نفس الهزة ديال سنين كتلقى نفس صورة ديالك انت وياها كتوكلها تمرة كتوكلك تمرة ....كتبقى تأمل فيها كتقول في خاطرك ايييه العمر فين ايام صبيحة السبت المقدس....
كتخرج مع كطل على كوزينة كتلقى حبيبة العمر في البالكو كتصبن ..ماكينة عامرة حويج لبانيو حتى هو لابسة واحدة بيجامة فيها موزونا و عقيق واحد سروال طويل مهلهل من لتحث حازمة راسها بزيف حياتي...كتشوف فيها كتقول صباح الخير كاين شي فطور ..كتجوبك جبد راه سخن خبز دار راه اتاي في براد ..ويلي ابا فين ايام قطعني حتة حتة ورميني مئة قطة ، فطور فرنسي و فطور لبلدي صابحين على بوسان و لعضان وي حبيبة واووووو ( تي مو غون فو ) حتى اهات و اح اح اح ..كنت كترجموها لغات عالم....
كتفطر خبز حجرة اتاي بارد ...و راديو خدام بادي واحد برنامج متبعاه هي ...سميتو هموم شعب ..بدات واحد خيتي متصلة ببرنامج كتبكي راجلي هرب خلى لوالاد ما عنديش باش نوكلهم خرجتهم من قراية..كتحط لكاس و لخبز من يدك كتنوض تقلب اذاعة محمد السادس للقرآن الكريم ..كتسولها فين هما دراري ...ويلي ابا فين ايام خوليو و سلين ديون براين ادامس...
دراري احمد عزيز هبطو يلعبو كورة ...فاطمة زهراء مع صحبتها في سطح ..غلطوا في حياتكم غرقتوا ولاد بجوج مسؤولين بجوج فشلتو في تخطيط ..بجوج بديتو زوين ساعة طحت في محظور ملل تسرب انت وليت خارج مع دراري في قهوة من ماتش ماتش ..و هي في دار كتفرج في خيط بيض وقائع و مسلسل المصابون..كلشي طفا كلشي برد كلشي مشا مع الواد...ولدت الاول ثاني ثالث ...ديما كتبردوا على راسكم كل كيتولد برزقوا ...كيخرج هاز معاه رقم كونط لي عطيه سيدي ربي !!!
قودتوها ديال بصح كملايين لكوبل مغاربة ..نتجت نفس الاسرة السلبية المقودة على دين مها ..لفقر و الاولاد و الكريدي و الخنقة....شرفتو بلا وقت ...كتلبس حويجك كتخرج لقهوة ..كتجي كتلقاها طيبة لغداء كتريحوا مجموعين ها لي باغي سويع ها لمريض ...ها لي تقطعت ليه سبرديلة وحيدة لي عندو...هم في غم..كتزيد مأساة عمق ..غداء فيه مرقة لفت لصفر و لبيض مع لحم راس...ويلي ابا فين ايام allo حبيبة اش مشهي نوجد لك..ايام كنت كتكل بموني معلق في باب ثلاجة ...كتنقط ليها في وقة معلقة ...كنت خالقين سعادة ديرين ماستر شاف بوحدكم...
رغبة ماتت ..كتبدا تغوت خلونا نعسو كتكا انت وياها كل واحد وجه كيشوف في جيه ...شوية كتسمعوا صونيط ...مك جات هههه....من طبيعة لحال خاص مها تجي ...باش تعقد جلسة مجلس الامن للحسم في قضية فلسطينة و مسلمين في بورما ...من حسن حظك خوك لي لباس عليه كيعيط لك جو عندو جيب معاك دراري للفيرمة خليهم يفرجوا هنا كاين خيل كاين لبسين ...كتهز لحزاق كامل مك و مها و دراري كتوصلهم وكترجع ...دائما في عائلة كتلقى واحد كينفسها عليكم مصدر سعادة دائمة...اكيد ماشي انت ههههه
واخيرا انت وياها راس في راس ...جاي معول تحي ليالي ملاح ...مع كدخل كتشم ريحة حلبة ..كطل فيه كوزينة كتلقاها كطيب في رفيسة ..يطلعوها جارات عند وحدة ولدت فوق منكم....هههه هذا زهر مخور ...كتجي تبغي تبوسها كتقول لك بدارجة راه مدخلة الوداد ههههههه..كدور وجهك كيبان لك واحد لمقدة ديال لعيد كتقول نضربها تموت و نتلاح انا من بالكو ...نوضع حد لهذا فيلم ديال أمنا الارض ....كتنعل شيطان ...كتمشي تريح تشد رياضية بادية لفروسية ..ما عندك لا bein sport ..لا حتى لعبة ...
شوية كتسمع سميتك ...كتنوض تهز قصرية طلعها لاخر طاج ...كتهبط تخدم خالد ديسك ديال هاي ودي كاع ناس بزهرهم و انا زهري أونبان ...كتهبط قصرية فيها واحد شوية رفيسة وجناح و زك دجاجة ..كتكل اش قسم لك الله ...كتهز زك دجاجة بين يديك كتبقى تشوف فيه كتخشيه في فمك...ما كاين والو ما كاين والو اللهم زك دجاجة....
ما كاينش هذا شي نوض يا اخي و يا اختي ..عيط لحبيبتك او لحبيبك..ديرو قهوة جبدو تليفون حلو الفايسبوك ..دخلوا عندي قرا عليها هذا سبت و قراي عليه هذا السبت...خودو الحكمة و العبرة و الدرس...لا يوقع ليكم فحال هذا كوبل ريحوا خططوا مستقبلكم لا تغرقوا فحال هذا جوج....ودعو الله مع طارق بنحريف شي 5 مليار الاورو ....نبقى لابس شورط و موكسان وشوميز فيها نخل و اناناس و داير شابو ديال القصب وتابع صيف في ما كان في عالم....حيد طفي ....
0 التعليقات: