فلاش باك ...الامام البخاري

4:31 م tarikbenhrif 0 تعليقات

فلاش باك ...الامام البخاري.

مشيت ليوم كنتسركل انا يوسف معضور في الحي المحمدي كلينا البابوش و دزنا تفرجنا في الحلقة ديال احمد طويل وكوميرة في ضغمة ...

دزت حدى مدرستي الابتدائية ذكريات تماك قراية ..شغب ..الغرام ..التفرشيخ التحمال ..نجومية ديال شكون غادي يحضى بشرف يحضي القسم في غياب الاستاذ ؛ عيد العرش والاستعدادت الملحمية ؛ و زراعة بطاطة وسط قرعة الماء مقطوعة من الوسط ولواية كتجمع ناموس ؛ والاختراع ديال دارة كهربائية لنكتشف من بعد ان راه ما ختراع ما حتى خصية كنا أغبياء ...تفكرت أيام المطعم المدرسي الله يسمح لينا كين لي قتل أباه كين لي قتل مو وكين لي ضحى بيهم بجوج في سبيل يخد لاكارط ديال المطعم المدرسي باش يكل محمصة بالحليب وربع خبز و 6 تمرات ؛ كانوا معلمين عزاز على كلشي حنان والله يعمرها دار كيتعونوا مع تلاميذ هما قلال ؛ كانوا معلمين ولاد ل..... ما كيحملهم حتى حد وهما لي بزاف كيبدع و كيجتهدوا في حاجة وحدة العصى بكل أصنافها الله يسمح ليهم وسويع جيتي عندك نقطة وديز لعام يضحك ما زدتيش سويع كيدوز علك العام فحال لا مشدود في معتقل سياسي يترصد لك معلم أ بسط خطأ باش يخلي دار بوك ....وكان كل قسم فيه أربعة ديال دريات ديك لعبة لتخفيف ضغط على مدرسة الاناث المجاورة ...وهما ديرين فيها نجمات هوليود مع العلم أنها فاقت بيلة في حويجها شأنها شأن باقي الزملاء الذكور...كلشي كيتنسى اول ما كيصوني جرس الخروج وبا عراف الحارس كيشير بيتيو الخضر ويردد خرج خرج خرج... مباشرة كنتوجهوا عند أمي عيشة مولات شامية والزريعة ...وأمي خدوج مولات الخبز وباسطيلة كتغطسها في سطيلة ديال الماء والحرور ....وجري يا ما تجري باش تجي مع طلعة الاغنية ديال رسومك المفضلة ...بساطة أكثر حياة أجمل .