السبت المقدس الحلقة 33

12:09 م tarikbenhrif 0 تعليقات

#السبت_المقدس
 
الحلقة وقيلة 33...
كانت ساعة تشير الى ديك 55 عشية خرجتي بكري انت من الخدمة ، و انت هابط في سانسور على غير عادتك كتغني ( céline dion -i'm alive ) و كتشطح زملاء زميلات في خدمة كيشوفو بإستغراب دوزتي نهار شطيح و غنى كتسلم على كلشي ، طبعا المغاربة ما يعطلوكش وقيلة جاه بريم وقيلة ترقى وقيلة جاتو قرعة ماريكان وقيلة خطب بنت المدير ، انت ما على بالكش بيهم خالق السعادة ديك لقطة لي كلنا فايت شيفنها في فيلم مريكاني داك الموظف لي ساد صدفة لفوق و داير نظاظر قاع الكأس ماشط شعرو جنب ما كيدوي مع حد خدمة دار دار خدمة و الانظباط ...شوية حتى كيفروح و كيدخل صبيحة يوم من ايام الاسبوع المتشابهة مبدل لوك مبوغس و كيطلع فوق مكتب كيشطح شطحة مايكل ...نعم انه الحب يا سادة يصنع معجزات ..
 يوم مميز في حياتك دزت لباتسري بزربة لقتيهم موجدين ليك الكوموند الحلوة الملكية مصيبة خصيصا لهذا مناسبة ..ركبتي دزتي عند بوتيكة ديال صحايبك لقتيه موجد لك داكشي لي طلبتيه عليه كلشي 5/5 ، عنداك تنسى الشمع أ راس لخصية تولي معدي بداك ديال صاكة فحال لا مريح في بويا رحال جايب ليه قرطاس شمع راه هذا تفاصيل هما سر تفوق لغرب علينا ...دزتي خدتي شمع لبولوني بألوان و رائحة مختلفة ...اش بقى اش بقى اش بقى لورد خاصك تخد شي حاجة سبيسيال للمناسبة حيد عليا من الورد ديال سبيطارات و لعراس شوف لك شي توليفة اورجنال تليق بعظمة اليوم ...
 كتوصل لدار كتغسل لماعن كتشطب كطرف ، عادي هذه هي حلاوة الحياة بعيدا على انا رجل انت مرأة و قريبا من انت انسانة و انا انسان كنكملوا بعضنا ، كتبدا في اعداد الفضاء الشمع مشعول هنا و هناك و الورد منشور في كل مكان و عطرها المفضل ( طوم فورد ) يعم الجو ، لحلوة في بلاصتها فوق طابلة لعصير موجود ...الساعة تقترب و الدقات القلب ترتفع كميات من أدريالين تتدفق في دمك ...اش تقول اشنو رد لفعل ديالها ...!!
 كتسمع حس طالون في الدروج قبل ما تفتح هي كتزرب عليها انت كتبوسها ما فهمت والو كيزيد الامر غموض كتغطي ليها عينها بشال لي شرات لك شتاء الماضي و لي غارقك في عطرك ...كتهزها مباشرة لدوش لي انت موجدو بالخزامة و العطور الشامية و الشمع كتخلها تماك كتخلي ليها رسالة فيها لداخل ورقة مكتوب عليها :
 عارفك ناسية ياك كنقول لك نقصي من ماكلة ديال حلوة ملفاي و كأس رايب راه كيمحو ذاكرة هههههه عيد ميلاد زواج سعيدة حبيبتي كل عام و انت انا و انا انت احبك و كفى.. من تسالي دوش دخلي للبيت تلقاي شي حاجة لك ...ما بغتش ندوش معاك حيث لا دوشت معاك نصدق واكل الحلوة ديال لحم و نخلي لحلوة ديال لاكريم ..نسبقو لاكريم من بعد لحم هههه..
 كتمشي تستغل وقت لي كدوش فيه هي تقاد طابلة في صالون مع موسقى و لعشاء و شميعات ، كتحط لحطة شوميزة لو-لان سماوية لون و سروال بيض حتى هو لو-لان شي شال صيفي خليط بين غوز و لكحل داكشي ديال هواي رشات من عطر العربي اسمه مشاعر ....كتخرج تريح في طابلة تسنى لوف سطوري ديال حياتك..هي كتسالي كدخل لبيت يا رباه على مفاجئة غوب مارياج لي كانت ديما كتحلم بيها لابسة ....دموع لفرحة و لخنونة جاب الله بقى ما درتش ماكياج اما كون ولى وجها فحال خليط كيكة بشكلاط من يالله كتصوب ....كتنشف شعرها كتقاد كتلبس كتخرج عندك ...اول مرة ما قدتيش تحبس دموعك قدامها عنقتها بجهد و قالت لك في وذنك علاش كلفت راسك حبيبي !!
 علاش انت سمحت في كلشي على ودي حتى لعرس لي كيحلموا بيه دريات تخلتي عليه ضحتي بكلشي من اجل باش تكوني معايا رغم ظروفي صعبة و لفقر مدقع اختارتني انا رغم انك كان ممكن تزوج احسن مني اجتماعيا ماديا و رفضتيهم تخاصمتي مع داركم ناس الالبة هاي كلاس على ودي انا لفقير معدم ولد لكريان ...كتجوبك دون تردد انت بوحدك في عيني رجال العالم .
 ما نسيتش من كنت كتعودي ليا على حلمك من كنت طفلة كنت كتحلمي لابسة كسوة بيضة هازة الورد ناس كتصفق عليك كان مجرد حلم طفلة اغتاله الزمن حتى لعرس سمحت فيه ...حيث ظروفي كانت لا تسمح ليوم حمد لله تحسنت الامور شوية جاء وقت فاش نحقق لك حلمك لبسك كسوة شهيرة ....اكيد هنا لا مجال للكلام خاص بوسة ديال الكفار و المسلمين و اليهود و الهندوس و البولحدين بوسة فيها الانسانية كاملة ....جاتها لكسوة واعرة بزاف رائعة ...كتحنى كتبوس يدها سيدتي تسمح ليا بهذا رقصة هههه ويلي ابا على دون جوان ...رقصة العمر ماشي مهم واش كتعرفوا تشطحوا مهم هو شطحوا حس بيدك تكتشف جسدها خليها تحس هي بنفسك ريحتك ...ما تنساش احسن سلفي في العالم من وضعيات مختلفة باش تلقاو ما تورو لولادكم هاكا احسن من العمارية فحال الى هازينك هاربين بك من تحث الانقاذ انهيار عمارة بوركون و سباتة ...
 كتيريحو تعشاو كدور لها صمطة ولاو عندك لي هونش أ حبيبة ههههه ..حتى انت راه راسك شاب و لكن موطور نحيلة هههههه ، كتخلقوها ضحك شدان و ذكريات و الحديث على المستقبل بأمل و تطلع لما هو احسن انا حبكم يزيد يكبر معاكم فحال شي شجرة مغروسة وسط دار ....حيد لعشاء و حط لحلوة مكتوب فيها#الحب_المقدس ويلي ابا تشهرت انا ...من بعد غرقوا في ممارسة الحب المقدس بكل جنون و وحشية عنداكم  تنساو الشمع شاعل حتى تولو من الحب المقدس الى الحريق المقدس لا عولتي على بونج ديال اشهار مل كتشدش فيها لعافية ثيق بيا حتى محروق شر حرقة ....
 هذا شي راه ماشي خيال علمي ...ماشي مستحيل ..ماشي خاصك تكون ملعق و بورجوازي داكشي ...كلشي هذا فيلم لا غلى لا غلى 1500 درهم ..اشنو هي 1500 درهم في عام كتخسروها غير قهاوي في ويك اند على بطولة اسبانية و انجليزية ..هذا شي خاصو شباب دراري دريات ولاد ليوم باغين يعيشوا لافي يستمتعوا يخرجوا على نمط ديال copie coller خدم خود كريدي تزوج و ولد ضرب لمرقة في لكوكوط حتى تموت ...الحياة بغاتنا نأمنوا بها نعيشوها نستمتعوا بها ..فن العيش راه ثقافة و تربية ماشي لعاقة و طبقات اجتماعية ....