السبت المقدس الحلقة 26

11:38 ص tarikbenhrif 0 تعليقات

#السبت_المقدس
سبت من عوالم أخرى ...سبت مقدس ديال شعب عظيم اسمه مغاربة ...اصحاب نظرية ما عندناش ما خصناش ..وخا هما راه واصلة فيهم لعظم...
بقلم : Abdelfettah Jawad....زدت انا شي حاجة من عندي ...بتصرف و بعد طلب الاذن من الاخ جواد....
السبت الصباح اللي ماتفيقش فيه...كتسمع سقيل اللهم صوت راديو ديال الواليد بجملة شهيرة طن طررن هنا رباط عند الاشارة تكون ساعة 8 صباحا .. كدير مقراج يسخن للوضوء و للفطور كتوجد الفطور على قد الحال فطور طبقات المسحوقة بريريد ديال اتاي مشبشب او تحط شوية زيت العود و في أحسن الاحوال زبيدة بلدية جابتها ليكم جداك من العروبية او تجيب محيرشات سخان من عند با عمر اللي فراس درب ، كتحط طويبلة و داكشي فالمريح الصغير ..راكم عارفين ديور المدينة القديمة بيت او كوزينة او مريح ...مهم السترة ..
كتمشي تفيق باك أو الحنان اللي هادي خمس سنين او هوا شاد الفراش مسكين كتبوس ليه فوق راسو او يديه او كتعاونو يوقف حتى يمشي لطواليط ...كتحسن ليه وجهو مع بوتفتاف كتحاول ما تجرحوش حيث مسكين ما كيقدش يخلي راسو فيكس كيف ما كنت انت كتحبو هو كيحاول يشدك يخليك فيكس خايف عليك لا طيح .... دار زمان و طاح هو مسكين..
كتخرجوا كتجيب ليه تيمومة وتوجد ليه زبية كتحط ليه كرسي باش يصلي ...رغم حالة صحية متدهورة علاقة مع الله خالقه باقية و تتمدد..درس في الايمان بالقضاء و القدر ... من بعد كتهزو بين يديك او كتكلسو فالمريح أول ما كيجلس كيسولك على مك... و كاتقول ليه ها هي لحبيبة ديالك دابا نفيقو لك ملكة ؛ ونفطرو مجموعين....مهم كتبغي تخلق جو اومبيونس باش ما عطى الله...
كتمشي تفيق الواليدة مسكينة اللي هي اصلا ناعسة فالمريح على واحد السداري عامر حلفة يصلح لأي شيء الا انك تنعس عليه اصلا اكل عليه الدهر و شرب ، هي نعسات مسكينة تماك حينت الليل كامل او هي سهرانة عساسة كاتسنى خوك يدخل اللي ديما عاطيها غير لسكرة او اللقصاير ضرب دنيا بوطي يموت لي يموت و يعيش لي عيش..مهم كل دار فيها كيدار بلا ما نصدعكم بخويا حيث هو سبب مأساة ديالنا ضرب فلوس وحب و تبن ، المهم كتفيقها او كتبوس ليها راسها او يديها او كتقول ليها نوضي ا الواليدة الحبيبة تفطري راه الفطور واجد .
كتنوض مسكينة و كتبوس ليك راسك او كتعنقك او كتقول ليك سير الله يرضي عليك ا وليدي يسهل عليك يفرحك او يهدي الله خوك...ولدها لكبير وخا هو سبابنا هو روح هو عقل معندي ما ندير .... او كاتبقا معنقاك او كتبكي مسكينة من شدة الظروف المقودة حتى دموعها يهبطو على كتفك ...كتحس بتريكو ديالك غرق في دموعها....
كتشوف فيها كتمسح دموعها...باش باك ما يشوفهاش هاكك ... الواليدة دابا يفرجها ربي او نخدم يسهل الله او نبرعكم ، كتنوض توضا اوتصلي او كاتجي تكلس حداكم ، كتشد فيهم ...كتوكل باك ...حل فمك أكبور...هاكي حلي فمك للشعيبية...مساكن كيموتوا بضحك...على صباح...كيدوز داك فطور زاز خصوصا من كتنوض تقلد مك في شطحة هههههه
حتى انك انت كتنسى روحك ما كتفطرش لكن هانية من رسمت الفرحة على وجوه واليديك في هذا صبيحة سبت مقدس رغم الظروف الصعبة والفقر المدقع ، كاتنوض تجمع لميعنات او كاتغسلهم كتقول ليك الواليدة الا غير خليهم . نتا كتحلف ليها مادير فيهم يديها .
كتشعل لباك قناة ب ي ان سبورتس الاخبارية حينت هو عزيزة عليه الكورة اخبار الكورة ، اصلا هو لعاب قديم من ناس لي عطات للكورة الوطنية لكن نهار كتاب عليهم مكتوب بالمرض ... لقا راسو مشرد هو اولادو لحنين لرحيم كلشي تنكر ليه صحاب معارف لبلاد.....مهم ربي كبير ...حمد لله كبرنا ربانا احسن تربية...اللهم داك لكيدار ديال خويا لكبير ....مرضهم بالفقصة....الله يهديه..
أنت مضبر على شي صريفة من واحد البريكول ...كتهز قفة كتخرج كتمشي لسويقة كتقدا خضيرة ديال سيمانة او شوية شي دجاجة ..شوية ليمون لكبير عزيز على باك... او كتدخل لدار كطلب من الواليدة تصيب ليكم الطوجين اللي عزيز عليك اكاتمشي تكلس حدا باك تكمد ليه رجيلاتو او تقرقب معاه ناب مرة على ميسي برشلونة مرة على كريستيانو و ريال و حتى على وداد و رجاء...باك مقتنع ان رجاء احسن فريق لعب كورة في المغرب...هو رجاوي حتى نخاع..
الغداء كيطيب على مهل فوق مجمر ...عيش أ حمريش حتى يحن الله...و استمتع مع والديك بكل لحظة راه يجي وقت ما تلقاهمش وتندم حين لا ينفع ندم...تعلم من تجارب ديال والديك...وياك دير نفس الاخطاء ...الى جاتك فرصة و عطاتك لوقت ...ضرب لحديد سخون ما تزكلهاش...راه هذا لبلاد ما فيها تيقة ...تبكيك كثر ما تفرحك ...
ماكينش هادشي شوف معا داك خوك المسخوط تعونو....هزو الواليد دوه لحمام....يسخن عظامو....