السبت المقدس الحلقة 17
الحلقة وقيلة 17...
عند الاشارة تكون ساعة 8 و نصف ...جو بارد و صوت ريح شتوية ديال الله ميشي ديال مبارك ربيع....و الامطار كتسمع في شرجم ...كتحل عينيك بشوية كتلقها مازال ما فاقت معنقاك مخشية فيك فحال شي bb ، كتبغي تحيد ليها يدها عليك كترجعها لك داكشي ديال الشعب و الجيش يد وحده ...
انت عارف انك تابعك شقى شي تويشيات خاصك تقادهم في دار و تعونها فيهم ، حيث هذه هي حلاوة لكوبل الواعي لي عاش لوف سطوري...ميشي انت كتشوف فيها ماكينة ديال جنس و الانجاب و خادمة و هي كتشوف فيك كارط كيشي و ظل راجل و لا ظلي حيطة ، لا حل لك الا انك تورك ليها على بطونة لخضراء كل بنت فين عندها لبطونة لخضراء لي كتشعل منها من كتحب شي وحدة لحد الجنون كتولي عارف نقط حساس تفاصيل ديال الجسم ديال بعضياتكم..يعني كتمشي ليها لديك لحتة لي مجرد ما كتقرب منها كتسمع واحد صوت كيقول افتتتتتتتح يا سمسم ...
الى كنت كتبغي وحدة ما عارفش فين عندها افتح يا سمسم غير ...وجد مؤخر صداق نفقة فرتك جوقة براكة عليك من لعباسية راه ما هي حياة هديك...انت بكل حب شغف و عشق كتبوسها ديك نقطة لي بين تحث وذنها و عنقها فين كاين لبراج ميشي ديال جدارمية لبراج ديال الاحاسيس ، من تماك تأكد من سلامة ناموسية و لماطلة ، لوح بوه داك لغطا تمتع ليا في ملامح و في الجسد تخلص من عقد رجل العربي ديك عقدة ديال جسد ...ان هي لي خاصها دير انت رجولتك لا تسمح لك بأنك تمارس شي حويج ...راه من كتبغي تمشي تشري glace راه ما كتلقولش ليه عفاك عطيني شي TITAN فور-مان أو عطيني شي MAGNUM فور-وامن ههههههه بلا ما نزيد نشرح عيق أ راس لبريق...أويلي با على كلاص في برد ليالي حياني هههههه...
بعد ممارسة الحب المقدس صباحي لي عند سحر خاص أخيرا كا يجيك لعفو كتخليك لملكة تنوض من عرشك تشوف اش خاص لبلاد و العباد ..كثر ليا من لكريمات للشعب الله يحفظك خصوصا لبراتش راه ناس كتموت من لحرمان أ سيدنا ...كتخدم مزيكا صباحيات فيروز ما كتسمع غير حبيتك بشتاء حبيتك بصيف ...كدوش كتلوي عليك فوطة كترجع تهزها من فراش دخلها لدوش كتوجد لفطور ...كتفطرو بالحب و جبن البلدي و زيت لعود مخلط مع شي بوسات و لمسات ديال قطعني حتة حتة و إرميني لمئة قطة ...
كتلبسوا دغية نعام سيدي لبس SPORT ديال ويك اند ..حيث عندكم ما يدار شي تقدية ديال دار ...كتهزها تهبطها حتى لطوموبيل ...ويلي أبا على الحب ....اييه راه لحب كيخليك دير اي لعبة ضحي بأي حاجة تكافح تقاتل من اجل من تحب ...عرفتها حبتيها رغم علمك مسبق أنها مستحيل يجي نهار تمشي على رجليها تحدتي كلشي نظرة مجتمع داركم ظروف ..قررت ترتبط بأحسن درية في عالم جمعك بها لقدر في واحد اجتماع لي كانت هي لمشرفة و لمكونة سيدة مستوى فكري ثقافي عالي جدا خلاتك طحت من ثقب الاسود جيتي على راسك ....هي كتلقي محاضرة اخر بلان كنت تخيلوا انها تكون من دوي الاحتياجات الخاصة ...ما اكتشفت الامر حتى شفتها على كرسي خارجة من قاعة.....بعقلية عربية لخانزة تقول طفرناه حتى مع مولات رجلين بقى لينا غير هذه ... لكن انت انسان مختلف واعي مثقف قررت تقرب منها عجباتك قتنعت بيها ككيان كوجود حبتيها كإنسانة متكاملة الوجود ...سالا لفيلم ربي كبير من كتنوي لخير كتلقاه ...حتى هي مشات عند الله كنت بوغوص سديكتور رجعت ليها ثقة في أنوثها في طبيعتها...
صح اختيار صعب وصعب بزاف...لكن وحق رب الى حب مسخوط لوالدين لا يعترف الا بشجعان تزوجتوا جميع العقبات لقتو ليها حل ...لدرجة ان قصتكم ولات كتعاود ...ناس لساكنين معاكم حاسدينكم....شحال من جارة ظل دعي على راسها الله يعطيني شلل ههههههه غير باش يدير ليا المعطي كيف داير لفلان لفلانة ...المعطي غير من سميتو ما معوناش بين العربون يطلقها في شهرها ههههه...
صحة الانسان راه شي حاجة نسبية ، راه تبات صحيح تصبح مريض ، تماك فين كيبان الحب ديال بصح و الوفاء و التضحية ...للاسف رجال فيهم انانية عكس المرأة ممكن ضحي معاك تهزك تصبر معاك ..أضعف الايمان غير لا ما كنتيش قادر على الانجاب كتسمح هي في كلمة ماما احساس الامومة كتفضل تعيش معاك انت....في وقت راجل الى عرف المرأة ما كتولدش كيبدا يقلب ليها على صابونة...حقة حقة ما حقة باغي نخلي شكون يهز اسم ديالي...انت هو صلاح دين ايوبي او بريف هارت القلب الشجاع ...يا بل لحزاق ...الحمد لله شباب ليوم بدا كيوعى و تلاقيت بزاف لكوبل هاكا أخر عايشيين لوف سطوري مقود جميل جدا و كيمارسوا حياتهم بدون مركب نقص...في وقت كاين لي كتفرقهم غير قرحة المعدة ههههههه أو شخير ههههه....الله يرزقكم لعذاب عقلية الرميد ... أويلي أويلي ...
ما كاينش هذا شي نوض يا أخي و يا أختي...عيط لشي صديق او صديقة ..ديرو شي قهيوة بعقلها ...ضحكوا و لعبوا ...من تسالو دوزو ضربوا شي زلافة بابوش قوليه يرش ليكم مساخن في بلول راه مزيانين لبرد ....وشكرا ...
0 التعليقات: