السبت المقدس الحلقة 3

4:03 ص tarikbenhrif 0 تعليقات

السبت لي ما تفيقش فيه تلقى حبيبة حداك..كتغوت عليها و فلانة و فلانة ...لا مجيب ..أو فين مشات هذه ...لا حس اللهم راديو خدام إذاعة محمد السادس ...كتنوض تقلب في دار لا أثر ...كطلع لسطح ...كتبان لك حبيبة لعمر وسط بانيو كتشتف على مانط...

كتحس أنت بالخجل ؛ حيث و عدتيها بليل تفيق مع 6 تعونها ...كتحيد فوقتك...باش طلع تشتف معها ..كتقول لا ...رتاح يا الحاج يا تاج راسي قربت نسالي ...يا سلام...كتهبط انت و حاس براسك سلطان زمان ..كتقرر تصيب فطور ..كتخرج تقلب على شفنج فيما كان ..حيث عارف حبيبة عزيز عليها...

كترجع كتلقها سالات دخلت دوش انت داخل يدك عامرين بالخير...كتصيب فطور تقليدي بالمحراش ..زيت اركان و أملو..و كتصلق البيض ..لو في جهدك كثر كنت ديرو...شوية كتعيط لك أجي دوز ليا على ظهري...ما كتقدك فرحة ...شكون فحالك ترسم بيدك دوك تضاريس ...انت كتحك كتقول ليها أي اي أي أي صباكتي خارجة ..هي كتقول لك الله يمسخك ههههه

كتمشي تحط لفطور في صالون ..كتسنها ترخرج من بيت نعاس...يا رباه ..من كتخرج و كأنها ثرية مضوية ...كتريحوا كطفروا ...كتوكلها بيدك...كتقشر ليها بيضة كتقول ليها سد عينيك حلي فمك .. كتبوسها تخشي ليها لبيضة..محلتها تبنن لبوسة و لا تحضي مع صفر لبيض لا يوحل ليها ...

ﻷنك كتموت عليها بجهد...و لأن سروال قندريسي لا يساعد على ستر داكشي...كتولي فحال مخيم بخيمة في الواليدية...هي ميت بضحك...أنت خاري بضحك....كتقول لك اش نديرو لغداء ..كتقول ليها براكة علك تمارة ديال صباح...انا عارض عليك لغداء في جميعة كفتة جمل كبدة ...

هي كتفرح...كتموت على زرود ما كاين لا ريجيم و لا سيدي زكري...كتقول لك الحاج ..عرفت اش جابت ليا أختي من مصر ..اش جابت...!! جابت ليا لبسة ديال رقصات...ليل نشطح ليك على يا بنت سلطان...انت كتجوبها ويلي أبا على فيفي عبدو الله يرحمك أ نور شريف أجي تشوف أسي سيد...أه عنك تنساي ما تشربيش لفانيد ..معول تكحلها ليلة ؛ كفتة جمل راه وعر من فياغرا ..

ما كانش هذا شي ..عيط لصاحبك جيبو 30 درهم كفتة ديروها مع بيض مطيشة ...شي براد ..ريحو ناقشوا نتائج الانتخابات ....بين اكتساح مصباح هزيمة شباط...