السبت المقدس الحلقة 41
#السبت_المقدس
الحلقة 41 وقيلة .....
الموت ديال البرد الساعة تشير الى 5 ونص الصباح ، صوت المنبه واصل لراس درب ، بزز كتحل عينك كتخرج من فراشك ، تتوجه للنافذة دنيا بيضاء لليوم الرابع هي تثلج ....كدوز تغسل وجهك تعمر بريرد صغير ديالك .....مع خبيز و زيت بلدية ...كتلبس لمونطو كضرب طاكية على راسك كشكول و ليكات ...كتوقف عند لباب كتهز راسك لفوق في دخلة كتبان لك صورة عائلية معلقة فيها الواليدة و الواليد الخوت و الخوتات و الاصحاب في عرس خوك لكبير ...ولفت ضرب عليها كل صباح عاد كتخرج ...
خرجتك ظروف من بلادك فحال ملايين المغاربة ....جار عليك الوطن ما عطاكش فرصة فقط حيث كنيتك ماشي VIP ..خرجت تقلب على راسك و داتك الاقدار لأخر دنيا ...في بلاد فيها شمس مجرد إشاعة ....احساس صعيب انك تكون غريب في بلاد تجهلها و لكن احساس أصعب تكون غريب في بلادك التي تتجاهلك....و تسلبك أبسط حق من حقوقك ...كانت الحادثة لي تعرضت ليها و هزوك مهرس من رجلك ..حطوك عند باب سبيطار ما بغاوش يدخلوك حتى تخلص صندوق و لبلاكة طوعت واحد سيدة خلصت علك ....انت فقط ما كنتش هاز معاك خارج تجيب كتاب ......تماك تقطع حبل الود بينك بين بلدك...
مشيتي خلتي كل شيء جميل وراك بما فيهم ديك لبنت التي تحبها كثر من راسك ...ديك لبنت لي كتعرفها مك و ختك و ناس درب ...راه فلانة مع فلان ...ديك لبنت لي كافحت معاك جنبا الى جنب باش تقراو تخرجوا....ديك لبنت لي علماتك ما معنى المرأة ...نهار قلت ليها راه نخرج من لبلاد بعدما كنت وجدت كلشي و قطعت تذكرة ...حيث كون قلتها قبل ما كانتش تخليك ...اول ما قلتها ليها طاحت سخفت ...مرضت فيها ...كان لازم تمشي لمصلحتك مصلاحتها الى كتب الله ....بزز و بالبكى و العذاب أستسلمت للواقع ...انك مكره لا بطل ...العمر يمضي و كأنه ساعات ....
5 سنوات و انت هنا ...الحمد لله رغم البرد القارس و الوحدة و الغربة ...أقل شي كتحس براسك إنسان عند حقوق مطالب بواجبات ...كتخلص ضرائب وي لكن كتستافذ ...من التعليم و الصحة و الشغل و الامن ...كتحس راسك مرتاح ما كتخممش في دواير زمان ...وخا راه الحافظ هو الله ....الايام كتمر سنين ...توحشتي داركم ...توحشت ولاد درب و لعب لماتشات نهار الاحد ...و لقهوة و لفراجة في ماتشات و تدوار السمطة ...توحشت الرجاء و كورفا SUD ....توحشت ايام لبحر مع الدراري و لاطة ديال الحوت ....
توحشت نصفك الاخر ...توحشت أملك و حلمك في الحياة ...توحشت إبتسمتها كلامها كعيتها ...بكيتها و خنونتها خارجة و لكحل هابط من عينيها ....توحشت طلتها في صباح العيد لابسة التقليدي و هاز طبسيل فيه مسمن و لحلوة ...كتشد فيها قدام الحاج و الحاجة حلوتنا حسن من حلوتكم.....جايب لينا لفقاص واش عندنا العزو ....هههههههه جيبي شي كعب الغزال.....كتجوبك الحاجة او كيف درت ليها كعب الغزال يجيب كعب الغزال......فينفجر الكل ضاحكا ...هي كتحشم و تحمار و تزنك ......توحشت ديك لبنت لي عارفها كان ممكن تعيش معاك على خبر و الماء المهم تكون معاك .....لكن لا حتى حنا بغينا نعيشوا ولادنا يعيشوا .....
دازت الاشهر طويلة بزاف ...اخيرا بعد 5 سنوات دخلت لبلاد ....فرحة شداك من صبعك صغير ...اخيرا تشوف لحاج و لحاجة و حبيبتك و شلة لفسدانة ديال صحابك ....كنت مغربي مع وقف التنفيذ ...لقيت الواليدة في المطار و الواليد جايبين معاهم ديك بنت ناس.....مع خرجتي مع شفتيهم رجليك ما قدروش يهزوك احساس مقود بزاف ......خطواتك كيثقالو ..كتوصل تلاح على مك و باك في خطرة ....تفووو ينعل دين الغربة علاش ما تخلوناش نعيشوا في بلادنا تقسموا الثروة بالعدل كلنا نخدموا بلادنا و نعيشوا فيها .....كتعنق حبيبتك لي دموعها كتهبط فحال شلال .....احساس ما يعرفو الناس لي متغربة ....اول حاجة تقولها لك مك ....ولدي هذا بنت ناس من نهار مشيتي هي فحال بنتنا ...بنت الاصل و المعدن ...بلا ما تشعر كتبوسها في جبهتها بوسة المعزة و الافتخار ....كبرت بيك قدام والديك 5 سنين و هي كتقوم بدور ديالك فحال لا كاين انت .....
كدوز صيف كتشوف ولاد درب ناس لحومة ....كدير خطبة و عقد....هي رفضت لعرس دوك لفلوس زايدين فينا .....بعدة مدة كطلع ليها لوريقات كتلتحق بك ..كتبداو مشار الحياة خطوة خطوة نقطة نقطة يحمل الواد ....بنت لبلاد خبزة و براد ....حققت واحد رغبة كانت عندكم من زمان....هو تمشو تفرجوا في كلاسكو بين البارصا و الريال ....انت كنت بارصاوي معصب هي ريالية حتى نخاع ....كانت كتموت على كورة تيرانات لكن مستحيل كنت ديها معاك للتيران فيها للمغرب ....أنتما كتفرجوا في كلاسيكو من وسط ملعب كاب-نو ....مرة مرة كتبوسها في فمها .....هي كتقول لك ريح راه غادي تشدنا كاميرا ...ما شافوناش كنتباوسو ورا داركم ايام زمان....يشوفنا كنتبوسو مباشرة في BEIN SPORT.....كتجوبها انت بتمركيل ديالك بصح أ حبيبة يلوحنا في PC ولاد لحرام ..هههههه
ما كاينش هذا شي نوض هبط تقد لك حويج شتاء ولبرد ...و كثر من تقاشر ....خود لك شي كشكولات راه كيجو زوينين في الحطات .....تسالي دير شي قهيوة ...وطلع فحالك تفرج في الماتش المغرب و الكوت دفوار في الدار و خلق لومبيونس مع العائلة و لا عيط صحابك يتفرجوا عندك قول ليهم يجيبو معاهم كرواسة و دواز أتاي ....و خا راه والله ما يربحوا...
0 التعليقات: