السبت المقدس الحلقة 22
الحقلة 22
حياة الكوبل عبارة عن حياة صغييورة لا تحس و لا ترى بالعين المجردة هي فقط كتحس كتشاف بقلب العاشق و المحب لي ختار يكمل حياة ديالو مع انسان اخر من طبيعة الحال الاختيار ماشي سهل ...الى كان الانسان يفني العمر ديالو كيبحث على شكون هو كيحاول يفهم راسو ..فما بالك يبحث على انسان اخر و يفهموا يحاول يعيش معاه حياة وحدة.... انصهار روح مع روح و اندماج جسد مع جسد ...و اختزال حياة في حياة ...
كيزيد الحب يكبر من بعد سنوات زواج و استمتاع و اكتشاف لبعضكم و تخطيط و اعداد ...عاد قررتوا تجيبو مخلوقات لدنيا ....حبيبة ولدت لك بنوتة غزالة قطعة حلوى و شكولا انسانية تأكل في كل لحظة ...دار كلها حيوية و نشاط صراخ ....هي كتقول لك ها انت دابا تشوف اول كلمة تنطق هي ماما ...انت كتقول ليها و الله حتى تنطق بابا هي الاولى ....تمضي الايام مركز الكون ديالكم هي ديك بنوتة لنزلت عليكم رحم و مودة سكينة...اصلا حبكم كان موجود لكن معاها وصلتو اخر سطاج...ديال العشق...
كنت مفاهمين مبرمجين من طبيعة الحال بإذن الله تعالى ...ان بعد مدة تزيدو طفل ثاني ليكون الاخير ....داكشي لي وقع حبيبتك حاملة واش من دلع واش من فشوش و بغيت هذه بغيت هديك...اجي رايح قدامي نبقى نشوفك بغيت لولد يكون عندو فحال شعرك و عينيك..نيف لا نيف يكون فحال ديالي ملامح ديالي ...هههه اشنو بغتي تقولي زعمة انت زوينة عليا ههههه..حتى الحمل ديالها حلو فيه متعة و حب...وعدتها بعد الولادة تسافرو مجموعين في شي سفر عبارة عن Trip أنتما و ولداتكم...فرحة بزاف بزاف تعيش هذا تجربة مع وليدات حبيب عمر...
واحد نهار عيطو لك جي راه ...مرتك كتولد في مستشفى كتخرج تجري ..ما كتعقلش كيفاش جيتي شحال سرعة باش كنت غادي كتلقى راسك في لبلوك ولادة ...كتسنى تخرج باش تبوسها في جبهتها يدها تقول ليها سمح ليا يا أجمل أطيب مخلوقة في الكون...كتخرج عندك طبيبة ...سيدي تمكنا نعتقو وليد سيدة جاها نزيف حاد ..للاسف الله يرحمها الله يرزقك صبر ...
يا رباه علاش ...!!!
كتوقف لحياة في لحظة كلشي كيدوز قدام عينيك فلاش باك ايام تصاحيب مغامرة زواج بلا عرس مقودة عليكم حتى من دار صبغتها معاك ..عينيك كيتبلوكاو في بلاصتهم...كتكى على حيط كتنهار كإنسان بقاية رجل ..كلشي سالا في لحظة حبيبتك رحلت الى الابد ....الانسانة لي رجعت منك انسان في الوجود و رجل و اب مسؤول بعدما كنت لاشيء صعلوك شمكار و سكيري من البار البار و عدمي لأقصى حد....الانسانة لي أمنت بك في وقت كل تخلى علك كل ..مشات خلاتك....دمع هابط على خدك بارد انتهى كل شيء ...انت مجرد هيكل معبد مجرد عدم مجرد ذكرى مجرد صورة ..روحك انتهت...
ما تقبلتيش لفكرة ...دفنتوها دفنت راسك معاها انت حي...الحب لي كان بناتكم اكبر من ان يغطي عليه الصبر ...دازت ايام صعيبة بزاف انت ديك بنية و الوليد...عائلتك صحابك بقى يا الله شهر الكل بدا كيضغط عليك انك تزوج ديك هدرة ديال انت باقي صغير شوف لك شي بنت ناس تربي دراري ...ما يفهموكش اش كان بينك بين مرحومة حيث مجتمع عندنا في شكل ...ما يقدروش يفهمو ما معنى روحك معاك انسان اخر ....
مرة 3 سنين حبيبتك معاك في دار عايشة ...حويجها في بلاصتهم ..كتحط جوج طباسل في طبلة ...حتى انت كتبدل حويج وليداتك كتخيلها كتسولها واش ندير ليها ماء بارد او سخون .....تليفونها باقي كل يوم كترسل ليها رسائل حب غرام ...انت مؤمن انها تكون قراتهم وخا ما طلعاتش لك vu ...
داير برنامج بين تربية اطفال و لعمل...حمد لله موفق...لكن العائلة و صحاب مجتمع كلشي متافق عليك...خاصك تزوج ..خاصك تزوج ..خاصك تزوج خاصك تزوج...خاصك تزوج....ما عمرهم يفهموا انك كرجل كقلب كإحساس مستحيل تلقى راسك في حضن امرأة اخرى ...من غير الى بغتي تكذب تخيل راسك كتوهم راسك انت وسط ممارسة كتخيلها حبيبتك ...شي حويج معقدة ما يفهمهاش كلشي...اللهم الى بغتي تزوج تعتبرها خدامة تقابل دراري كوزينا..انت مستحيل تقبل هذا وضع...
بعدما كبرو ضغوطات و تخنقتي ...مشيتي دفعتي ملف للهجرة لكندا و و قفتي عليه ..و تقبلتي حيث عندك الاولاد صغار تكون ليهم اسرة...ما في خبار حتى حد ..حتى جيتي سلام سلام ...الله يعون الله يعون..هزت وليداتك هجرتي لبلد ..باش تعيش في سلام انت و هي و دوك جوج قطع ديال جنة لي رزقكم الله ...هي عايشة معاكم بروحها ...انت وفي ليها حياتك كلها... هدفك تربي دوك الاولاد احسن تربية ..هي كانت بغى لبنت طبيبة و الولد شي فنان ...بدتي كطراسي ليهم طريق باش يحققوا حلم ماماهم....ممكن نعيشو بلا الاخر..لكن مستحيل نعيشو بلا حب الاخر ...
هذا قصة حقيقة من واقعنا شفتها بعيني ...ماشي خيال ...الحب شي حاجة سبحان الله ....و الوفاء لمن تحب احساس مقدس ...هنا راه حية ترزق عايش معاها باقي سنة اولى زواج...و الى لقى كيفاش يخورها في شي ليلة حمراء مع عشيقة في ظل ..ما يعطلهاش .....احبوا بصدق...او سيروا تقودوا...
0 التعليقات: