السبت المقدس الحلقة 42

12:31 م tarikbenhrif 0 تعليقات

#السبت_المقدس

الحلقة 42 و قيلة ...( قصة واقعية )

كيف العادة ديما تالفة لك فردة ديال تقشيرة و معطلاك ، كتقلب حتى تعيى كتقرر تلبس كل وحدة في لون فحال بلو مارين مغموق فحال نوار اصلا شكون دها فيك ؛ كتلبس معطف الغليض حيث شتاء خيط من سماء ...كتخرج كتسلت مع جناب لحيط فحال لحنش حتى كتوصل سيارتك لحقيرة لي مازال ما بغى يسالي كريدي ديالها ....كطلع دير أمارش كتخليها تسخن كتحل بواطة كون تجبد بارفان ترش على راسك ....كطلق مزيكة شتاء لبرد حلاوتهم الغيوان و سعيدة فكري و ما شابه....كدوز مكالمة ألو فينك 30 دقيقة انا عندك بقاي معطلة قدام مراية كعادتك فحال لا غادين لعرس M6 تزوج ثانية ....ههههه

كتخليها منشورة بضحك كتقطع ....زحام كازا خانق ..كتحول تربح لوقت بين زناقي ....توحشتها مكرهتيش كون كانت عندك شي وحدة ديال فورميلا وان 360 في ساعة ، شي شهر ما شفتها كانوا امتحانات كنت شارط عليها قرايتها اولا و بعد نجي أنا و طوفان ......اوووووواه شهر بزززززاف في وقت العشاق خصوصا الى كنت في نفس المدينة ...لكن الله الله على الجد و الجد الله الله عليه....انت كنت ناضج شارب عقلك ...وقت لي خاصك تكون عشيقها و حبيبها راه اكثر واحد مجنون كتخليها باغية ترسم لك تمثال و تحطو وسط ساحة لحمام ...وقت المعقول انت هو خوها الكبير لي كيخاف عليها و يحميها من نفسها اولا.....هاكا انت معاها ...هاكا هي بغاتك وخا هي صغيرة علك بزاف....داكشي ديال ديسك شاب حسني ربيها على يدك ...و أنت شيب بدا في راسك وليتي تشرب حسوة مع 8 وتنعس هههههه كيف ما كتقول لك هي من كتبغي طلعها علك سير تشرب لحسوة bb ... كتموت فيك أنت تعشقها الى حد شي لعبة مقودة ....

كتوصل كتلقاها واقفة ، كطلع كتعنقك بجهد و كأنها أول مرة و أخر مرة غادي تشوفك ...جاك إحساس غريب جدا فحال الا بغات تقول شي حاجة هاكا هو الحب يكفي لمسة نظرة حضن باش يعبر و يبوح على أسرار و احاسيس و معاني ... كتسولها صافا توحشتك بجهد كيف كانو امتحانات ....واش مع ثلاثة الاولين و لا من صحاب العباسية و مقبول ...كتجوبك صافا صافا حبيبي ...كدوز تشرو شي تويشيات ماكلة شي مشروبات ماشي روحية طبعا ....كطلعوا لبارطما على بحر ...الحب بلا برتوش كالبنك بلا فلوس ..

كدخلوا بجوج توجدو لعيبات ...مرة مرة شي قبلة فرنسية صنع ...شي بوسة مسروقة من العنق ....هي كتقول لك رايح ..انت كتقول ليها معايا انت و شهر ما شفتكش كتقول ليا ريح ....ماشي حرام ماشي عذبك الله ....هههههه ....ما كضحكش عجيب راه احساسك كان صحيح شي لعيبة ماشي هي هديك....كتقلب ستة تسعود ...كتريحو دوو في مواضيع مختلفة ...حاس من عينها بغى تقول شي حاجة و مترددة ...بلا ما تشعر كتحط يدك على وجها كتقابل عينك مع عينها كتقول ليها حبيبة اش واقع .....حينها فقط يهبط شلال من دموع ...يا رباه على مشهد شحال مقود صعيب بزاف تشوف شي حد كتبغيه حزين كيبكي قدامك فما بالك الى كانو دموعو كينزلو فحال شلال ..
 كتعنقها بجهد لعناق احساس بالامان و الدفئ ...حبيبة مالك اش بيك اش واقع ...واش ما خدمتيش في امتحانات ..واش شي مشكل في عائلة ....لا لا لا ...اصلا ما قدراش دوي ...كتأشر لك بصبعها لصاك...كتنوض تهز صاك كتقول لك حلو ...مع كتحلو كتحس دنيا وقفت بك العالم انتهى و غرق في العبث و العدم ما بقى عند دين مو تا معنى....كتلقى حقنة أنسولين و شوكة و الة قياس سكر في دم.....كتفهم انها كتشفت راسها حاملة لداء سكري الصنف المقود.....وحدة اخرى كانت تخبي علك ...لكن هي مستحيل الحب الصادق و العشق الصافي ....

كتحط صاك كترجع لعنهدها كتعنقها ، بجهد انت حابس دموعك ...بنت يالله دخلت لعشرين وردة يالله تفتحت عندها احلام و طموحات كتلقى راسها فجأة مريضة مرض مزمن يقتل في عالم كثر ما تقتل الحروب ....اللعنة على هذا المرض ...كاين جوج خيرات يا إما تخد بدها ..يا إما ضعاف معها تزيد تغرفها ....سكر ماشي ساهل ...في لحظة كتقول لك انا ما بقيتش انا لي عرفت قبل ...كتحط صبعك على فمها ...انت تبقاي انت الى اخر نهار في عمري ...حتى حاجة ما تبدل ...انت كل نساء الكون انت سبب من اسباب وجودي ...انت معنى من معاني الحياة ....انت هي انا وكفى ....كتعنقها عندك كتحضن عليها فحال شي بنت صغيرة دموعها على صدرك ...
 في المواقف و الظروف الصعيبة عاد كيبان الحب ديال بصح ، المرض قدر و مكتوب ممكن يصيب أي واحد فينا في أي وقت ...ما تخلتيش عليها عونتها و اخدت بيدها رجعت ليها ثقة في نفسها و سعدتها على تكيف مع الوضع الجديد ...مشيت عند طبيب كتسول كتسقسي كيفاش تعامل معاها اشنو خاص تجنب معاها ......خطوة خطوة قدرتو بجوج تجاوزو مرحلة صعبة من حياتكم .....كنت ناوي تزوجها بعد اتمام دراسة ...صدقت مزوجها قبل حيث حستي انك خاصك تكون معاها تكون معاك ....خلتها تكمل قرايتها و تخدم....الحب لي كان زاد كبر ...احساس مقود توقف وقفة رجل وقفة انسان مع وحدة كتبغها و العكس صحيح....الحب ماشي غير ماكلة الحلوة و لافي أون غوز ...الحب راه مواقف و مكتاب و ظروف تحديات .....واحد اخر كان يقول مالي عليها نخد وحدة بمرض مزمن سكر حياة معاها صعيبة مغامرة غير محسوبة العواقب...كيفاش نتعايش معاها شحال نخسر عليها ديال دواء .. واش تولد ليا ولاد مراض ...دارنا ما يبغوش ...صحاب سكر حالته نفسية كتجي وقت صعيبة كيرجعو حساسين ...يبداو يدورو لك افلام في راسك ..تبدا تسلل و تخلى عليها بشوية بشوية حتى الى بقيتي معاها يكون بدافع شفقة و طعام و لملح ماشي دافع الحب و التضحية.....لهذا قلت واحد المرة في واحد الحلقة " أحبوا بصدق أو سيروا تقودوا .."

هذا لكوبل عندهم بنية دابا عندها 3 سنين عاشين بيس لوف سطوري ...درس في الحياة ...من كيبغي يطلعها عليها كيقول ليها حبيبة بلا ما ضرب شوكة في ليل انا نعطيك لانسولين ديالي فيه كمية هائلة من سكر و كليكوز هههههه ...هي كتقول ليه شكون فحالك اصلا أنا حلوة زادني ربي حلاوة أخرى هههههههههههه ...

ما كاينش هذا شي في لبرد شتاء ...بقى تحث لمانطة عيط شي لصحابك يجو عندك ...هذا لا بغاو يضحو يخرجوا من المانطة ههههههه ...تجمعوا عندك ديرو شي عشاء في دار شي سهرة غنائية و أو سينمائية .....حطو تليفونات من يدكم و استمتعوا بالحياة أ مساخط الوالدين ...و الى بغتوا تصرعوها شي تحمحيمة جماعية و طلق سخون ههههههه....و تذكروا القولة الشهيرة " أحبوا بصدق أو سيروا تقودوا...." .