السبت المقدس الحلقة 40
#السبت_المقدس
الحلقة 40 و قيلة ...( عن قصة واقعية ) طلب مني كوبل متزوج نكتب عليهم راه كيقراو في هذا شي دابا تحية ليهم..
كل واحد فينا عندو احلام أغلبها مع وقف تنفيذ أو مؤجلة لأجل غير مسمى ...كاين احلام من نوع اخر كتمشي على جوج رجلين عندها راس و قلب و اطراف كتنفس .....أن تحب هو أن تحلم ...هاكا هو الحب خلقه الله فينا حلم جميل نعيشه .....تحبها بجنون تعشقها عندك هي نساء العالم المرادف ديال الفرح و السعادة و الحلم و الامل...
ما كانتش فحال كاع دريات كانت مختلفة جدا ...كتحسها رجل معاك شحال من مرة سباتك عيراتك كانت ضارب معاك على ود نظرة او كلمة زايدة...ما كانتش فيها حس الانوثة قاصحة قاسية كضحك نادرا ..ما عندهاش مع روتانيات و تركيات ...كانت بنت لبلاد خبزة براد ...خطيها تحلوين و رومانسية داكشي ديال cute ...عشقتها حيث هي هاكك حرة أبية ...شيء ما داخلك قال لك هديك لبنت هي حلمك ....
بدتي كتحاول تعرف عليها من بعيد لبعيد ، اكتشفت انها بنت بي 100 رجل ، بدت كتفهم علاش هي هاكك أنثى في ثوب رجل ، هي لي في دارهم امها ماتت خلتها صغيرة باها بعد شهور فارق لحياة نتيجة لمرض خلاو وراهم جوج خوتها صغار ...وجدت نفسها يتيمة في مواجهة الدنيا و الزمان قدرها هو هذا في ظروف صعبة و مجتمع ما كيرحمش ...خدمت في ميناج غسلت طباسل في ريسطوات دارت سوايع لدراري ...دارت فراشة...كتخدم كتقرى ..هي الاب هي الام ..مقابلة خوتها...دنيا نستها انها أنثى ..ديما سبرديلة ودجين و شعر مجموع مكرهة باش تبعد عليها ولاد لحرام ...عاشت دور رجل لدرجة نسات راسها ....كملت قرايتها بإمتياز توظفت ارتاحت على الاقل ماديا...لكن بقات داك رجل لي عرفتيه لي خدام معاك ...لدرجة أنها كانوا مسمنها في كواليس بوشعيب ...
حتى في خدمة عندها غير نيشان ...إمرأة حديدية ...وقعت في غرامها وحبها كنت حاس ان ديك لبنت مخبية شي حاجة لداخل ...خاص رجل يكون عند شجاعة و لجرأة يكتشفها ....درت مستحيل لتقرب منها تودد ليها كل مرة كتفشل ...واقف كدوي معاها وحاضي لتزرع لك شي كروشي او شي نص تجيبك على راسك .....كانت كتريني شي رياضة ديال تفرشيخ ....حتى قررت تمشي توقف عند باب دارهم ....كتصوني كتحل عليك غير هي ...كدخلك مرحبا ...احساس غريب عجيب ..كنت كتوقع انها ما دخلكش ...اصلا ما خايفاش منك ..كدوو كتكلموا كتعود لك .....كتخرج مغروم كثر و كثر ...كتقرر تمشي حتى نهاية ...كتخطبها كدخل ضرب حتى انت لاصال باش تقدر دافع على راسك لا كان تفرشيخ...سنتين كتزوجو ..
تتذكر اول ايام زواج مني غادي تكتشفها كأنثى ..ينعل دين لعالم ينعل دين فاتي فلوغات ...ينعل دين صحابات احلام بنت الغنمي ....أنثى متوحشة كفرس طلقتيه ليعيش طبعيته ...حتى في الحب و الممارسة المقدسة عندها نيشان ما كتخليش من حقها ....دائما ما كتخرج انت بإصابات على مستوى العنق و السدر ...و حتى راس لدرجة انك ولتي كتفكر تنعس معاها داير لكاسك ديال موطور ههههههه ....
بنت ديال زمان يعول عليها ...مقاتلة فاهمة لحياة اشنو هي ، ماشي فحال شي وحدات كيصحابو ان الحياة مسلسل تركي بعيد الامد ...هي حلاوتها فأنك كتخليك تعذب باش توصل لديك الانوثة ديالها ...ماشي فحال شي وحدات كخرجوا انوثهم للعرض بالتالي ما كتبقى عند ديك الانوثة قيمة....كتحبها و هي متوحشة و قاصحة و صلبة ...حتى لغيكل ديالها ما كتعرفهاش امتى فاتوها ...ماشي فحال شي وحدات منظمة الامم المتحدة و المؤتمر الاسلامي كيسيق ليهم لخبار .....
الى وصلت ليها للانوثة ديالها فأنت أسعد رجل في الكون ...من داك نوع لي يحب و يعشق بعنف و توحش..كتجيب بلزير ديالها ممكن تغيب و تسخف او كتعنقك و تبكي تبقى تبوس فيك ...كتقول لك في وذنك my king اي لوف يو ...عشت معاها لافي و مل ندمتيش على اختيارك ...حلم انساني كيتمشي قدامك ...كتبت انت وياها قصة حبكم تحث سقف بيتكم ماشي فحال باقي لكوبل ديال قهوة كل ويك اند ريسطوات سوليمات و لبراتش ....عشتوا تصاحيب في زواج عيشين اون كوبل في زواج ....ما كتخلوش لملل يدخل بيناتكم....حتى لا دخل كتنوض تجرو عليه برياضة او شي خرجة او زيارة دار ايتام او تمشو مكتبة....علاش لا شي مباراة في كوزينا غير بعد من زاج ...ههههه
تحية لبنات القويات المتحديات الصلبات ديال زمان لي عارفين ممت معنى الحياة كتلقاها خدامة على ولديها مقاتلة مع الوقت....اما دوك سخفانات ديال الشعر و فيديوات كليب ديال اليسا و شيرين يبقاو يحلموا و يتحلونوا....يتسناو فارس احلام يدخل من شرجم هاز مصباح علاء دين يحقق ليها احلامها ...نحب نقول ليكم راكم رحتوا في ●●●....
ما كاينش هذا شي نوض تغدى ودوش و لبس شي لبسة خريفية زوينة خرج تمشى ريح في شي مقهى مفوجة يا سلام لو فيها لاطيراس بقى تتأمل ملامح المارة راه فيها قصص و عبر و حكايات .....تسالي دوز ضرب شي وجبة دسمة ...و ختمها في شي كلاص مزيان ضروري خود فيه نوكا راه زوينة كتبقى تقرمش .....وشكرا ...
0 التعليقات: