السبت المقدس الحلقة 7
الحلقة 07
للاشارة هذا صورة مباشرة...شفت واحد كوبل غزال معاهم وليدهم كيلعبو في رملة...لان بزاف طلبوني نكتب سبت مقدس على مولى وليدات...كيفاش ممكن يعيش قدسية في سبت ...حيث بزاف غير كيولدو كيهملوا راسهم و حياتهم و حلاوة العيش ...بالحب و الخبز و أتاي و الوليدات..
السبت صباح لي ما تفيقش فيه ؛ تلقى سدرك مغطي بشعر حبيبة لعمر...هي حطها راسها ناعسة عندك و كأنك هي أنت و أنت هي ؛ كتبقى متكي حال عينيك كتأمل في جمالها هي ناعسة ...مرة مرة كدوز يدك على شعرها الحريري ...و كأن حقل ورود في فصل ربيع ...و كتبان رمل ذهبية ..
كتبوسها على خدها ما كتبغيش تفيقها ...حيث سهرة لوف سطوري لبارح كان شوية نيفو طالع و وصلت سطاج الاخر في قواعد العشق الاربعون ..كان فيها ابداع و خلق و تحدي للروتين ...داكشي ديال كتاب كماسوطرا ...كتبقى تتأمل في هذا الانسانة رائعة لي رزقك بيها الله ..مرة مرة كتسرق بوسات خفاف...
كلما شفتي فيها كتزيد تزعط فيها كثر و طيحك كثر ..كتفكر شحال صبرت معاك وضحات ..و أمنت بك في وقت حتى حد ما كان يعتقد يجي نهار تكون انسان ناجح...كيفاش حبتك و أنت فاشل ..كيفاش عشقتك و انت ناجح...درية ديال تصنع ليها تمثال ... فحالها قلال في هذا زمان...
لأن لحب بيناتكم طبيعي ديال الله ...كتنوض كتبوسها في ساقها ...كتورك ليها على بطونة ديال الاحاسيس ؛ كتنوض تمشي دوش ...و أنت عارف أنها تلحق عليك...حيث من كتبغي لبنت لي معاك كتولي عارف مفاتيح الجسد ديالها ....ديك لبلاصة بضبط ديك لحركة و همسة مصاحبة ...باش كديكودي كاع كودات سرية ...
كدوشوا ...كترجعوا لبيت كتخدموا منوعات فرنسية صدفة كطيحو في طراك ديال a tout les filles qui j'ai aime avant...كدوزها حيث عرفها ما كتحملهاش...حتى كتوصل رائعة اديت بياف la vie en rose.... كتنعسو في ناموسية في جو مت جد رومانسي ويلي أبا كل صباح انت لحب...كترخاو...شوية حتى كتسمعوا تقرقيب..
لباب كيتحل بشوية ...وقيلة لمشيشة..لا لا حبيبي مشة ناعسة في كوزينة...شوية داك مخلوق العجيب قرب بزاف ...كيطلع في ناموسية كيتخشى وسطكم...بعد 6 سنين زواج مغامرة جنون ..عاد 4 سنين باش ولدتو وليد ..مبوغس ملامح باه و شعر أمو ..اكيد نتاج حب اسطوري...ميشي عرس و بارطما و سرعة قذف ...
كتشبعو فيه بوسان ..وهو باقي فيه نعاس..بيجامتو ديال ميكي ماوس...كتشوف فيك كتشوف فيها...برضى و حب و قناعة و حمد و شكر لله ..ان الامور مشات كيف ما خططتوا لا انجاب الا بعد 4 سنوات...وخا داكشي على قد لحال ..امكانيات جد بسيطة...لكن وعي و حب و تفاهم...خلاكم تحداو ضعف الامكانيات...وحقة اسطورة زمان صعيب...
و عشتوا حياتكم...فحال لا راكم في كندا او شي ولاية امريكية دار من الخشب قدامك بحيرة ...و أنتما راه في سكن اقتصادي ...جارك يصلي في دارو يقول سمع الله لمن حمده...و انت في دارك تقول ربنا ولك الحمد...اما عبادات ليلية غير حاولوا حيث لا سمعتوا تقرقيب جيران عرفوا راه صوتكم سنفونية اح اح اح ..وصل صداها عند سنديك ديال اقامة...رغم هذا كتعيشوا لوف سطوري...
كتقول ليها حبيبة أنا نبدل نهبط نسخن ديك قراقاشة طوموبيل...كتجوبك علاش ما نفطروش هنا...!! لا لا حبيبة ندو محمد يلعب شوية في بحر راه سيمانة هو محبوس...منها نفطروا نبدلو جو نتمشاو شوية ...بيما وصلت 12 ندوزو مرسة نضرب مقيلة كروفيت شواية سرديل....اوك حبيبي لكن ها عار الله لي زويتر بوزروغ لا ...راه شتي اش درنا داك سبت ..باقي ضلوغي ضارني...هههه حبيبة هذا سبت نشدو شي فيلم ...عندنا راحة حبية...بدلي و لبسي محمد سبرديلة و هبطو ما تعطليش...كضربها ليها بي بوسة فحال دوك بوسات لي كيكونوا في نهاية فيلم مع ديك the end...ما كتسالي حتى لنهاية جنريك...
ما كانش هذا شي عندك في سبت صباح ...غير نوض عيط لصحابك دير أكبر خير في حياتك لماماك..طلع زرابي و لمانط لسطح...بما جاو صحابك...يعونوك فيهم ..صبنوهم و بقاو تشتفو ...ما حد باقي لحال سخون ..دغية ينشفو...ما تجو تهبطو حتى تلقاو اميمة وجدت شي طاجين بلحم جلبانة برقوق...ويلي ابا ...من لفوق تشبعكم غير دعاوي لخير انت و صحابك... و من بعد دوزو دفعوا قرعة مريكان راه بدات.....وشكرا...
0 التعليقات: