السبت المقدس الحلقة 36
#السبت_المقدس
الحلقة 36 و قيلة ...
داخل انت وياها راس في راس ، والخلعة شداكم فحال لا دوزو الباك هازين نقلة و الاستاز لي حاضيكم مصيفطاه FBI ، انت ضارب دجين و بولو و سبرديلة بارفان رالف لورن بنكهة الفانيلا صيفية ، وهي معاك بالحطة الانيقة شوميز و سروال و شال من اختيارها مغاير للون لبسة زادها رونقا و جمالا ، ليد في اليد ...كلما قربتو للباب ديال مكتب توتر كيزيد و لخلعة كتزيد و لعرق لبارد كيخرج ....
نعم يا سادة يا كرام اهم قرار في حياتكم غادي تخدوه ليوم ، زيدي دخلي انت الاولى لا دخل انت الاول ...ياالله نحسبو على عشرة هههههههه ندخل بجوج ...روحكم طفولية لا تفارقكم ...دخلتوا كتلقاو لعدول في انتظاركم كتريحوا كيبدا معاكم بروطوكول ...كيوصل عندها قابلة على هذا سيد زوج ..كيدور قابل على هذا سيدة زوجة ...لحظة صمت مقدس ...العين في العين كتحس روحك غادي طلع ....في ديك لحظة بضبط لا كان الحب قوي و صادق لوف سطوري مقود عشتوه ...كيدوز شريط علاقتكم فلاش باك قدامكم ....
العدول يا الله الشباب هههه شفتكم سرحتوا ياك ما ترجعتوا .....هههههه مستحيل نتراجع هي أجمل صدفة في حياتي ...انت اجمل قدر وهبه ليا الله في حياتي ...قابلة بصداق قدره كدى و كدى شي حاجة بسيطة جدا ....اصلا داكشي لي يجمعكم اكبر من كنوز دنيا راه حب و حياة ودم تشاركوه ...متافقين على صداق بيناتكم بلا تدخل عائلة ...وي موافقة ..كيعطوكم توقعوا ....و ها هي حكاية عمر غادي تبدا على سنة الله و رسوله....
ما كرهتيش تعنقها و تعنقك تبوسها بوسة ديال لبطل في فيلم مريكاني في اخر لقطة من فيلم ..بوسة طويلة فيها شي ساعة جديدة ماشي قديمة ...لكن دارها لعدول بو جلابة ، كتخرج من تماك تمشو تغداو في شي بلاصة بجوجكم ..حيث لعشاء يكون عائلي بين الاسر بجوج ...
كتريحوا تغداو كتفكروا التاريخ و الجغرافية ديالكم لبداية في الفايسبوك ايام ما كنت كتبان ليها معقد و كتكره دريات حاس براسك ، ما كانتش كتحملك ديما تعاليقها ضدك ...و انت لا تحمل نفسك حتى تجوبها كتخسر عليها جيم ....من كنت كتغبر كانت كتحس راه شي حاجة ناقصة وخا عمرك دويتو او تكلمتو ديما على خلاف....انت اصلا و لا انت هنا ....
حتى لنهار لي تكون مريح في قهوة تجي عينك في عينها ، عرفتك عرفتها ..ابتسامة خفيفة ما دوتوش...دخلت كتقلب عليها في الفايس اوووووواه هذا تيتيز عندي انا ما في خباريش ...حيث فعلا شحال من وحدة في الفايس زوينة كتلقى معاها في الواقع كتلقاها من سكان الفضاء الاولوين و شحال من وحدة كتبان لك عادية جدا كتلقاها في الواقع شيء كبير يا عمري يا ارض إحفظي ما عليك .....من تماك قررت دوي معاها و تقرب ليها ...وخا انت عارف راسك فاشل في الحب و الدريات لكن كتصرع الكرعين باللوبية في كاميلة و بيتين ليل يطيبو على الفاخر .....
بدات لعلاقة كتقوى و كتكبر مع ذلك ديما هي انعكسنا .....كتعصبك كتمسح ليها كومونطير...كتنوض هي تحيد كاع دوك جيمات ديالها على تصاورك ...زعمة غضبت جمعت شطيطها مشات لدار باها ...ههههه...عرفتي منين دخلها ..هي من نوع ديال لبنات لي عندهم قدرة كبيرة انهم يخدموا عقلهم عوض قلبهم ...يعني داك تحلوين و تعناب غير نسى يا حبيبي ...كون سبع و كولني ...اما الحلوة خليها للجبناء ...
الحب ماشي رعدة كضرب او شتاء كتصب ...داكشي ديال طالعة في دروج انت هابط تساطحت معها طيحت ليها وراق فيهم مقادير لحلوة هبط تجمعهم جات عينك في عينها طلع ديسك ديال شاب عاقيل ....الحب راه علاقة كتبنى فحال شي دار خاص ساس صحيح طاج من ورا طاج ...حتى كتوصل لسطيح ...
سنين من لوف سطوري مواقف فيهم عشق حب و جنون مغامرة داكشي لي دارت معاك ديك لبنت والله ما دارتو انجلينا جولي ما براد بيت ...مجنونة واش كاين شي وحدة تجي توقف تحث شرجم داركم من كتكون ضرباك لحزقة طالع لك دم ... كتصفط ليك ميساج طل من شرجم يا تهبط نمشو نخرجوا يا نغوت نجمع جوقة واكواك أ عباد الله خسرني و تعدى عليا...و انا دابا حاملة بتوام ..هههههههه
كتبغيك لحد الجنون ثقتها فيك كبيرة انت عندها رجال العالم كلهم فيك ، حتى هي بنسبة لك الاستثناء الوحيد في حياتك المرأة الوحيدة لي قدرت تروضك و تحدهم لك ...الحب يا إخواني المواطنين و المواطنات لا يقدر بالانتخابات ...شي حاجة ساحرة كتخليك تعيش انسانيتك بشكل مقود ...جميع انواع مغامرات عشتوهم ...حتى اكثرها جنونا بلا ما نفرش ملفات .....
سنوات كفاح و نضال ..ولد شعب و بنت شعب ...صالير على قد الحال بارطما على قد الحال ....لكن اغنياء بفكركم و نمط عيشكم و ستيل ديال حياة ديالكم....من ضمن شروط الاولى هي لا للولادة الا بعد مرور 3 سنوات او 4 على الاقل ...حتى تكتشفوا حياتكم كأزواج راه لحياة خارج زواج ماشي هي داخل زواج ...تقدرو تجنو على داك مخلوق ...تلقاو راسكم مورطين في علاقة غير حيث درتو ولد او بنت ....انها للمأساة ديال الالاف لكوبل مغاربة ...يالله تزوج بي 6 شهر باقي ما عرفش حتى اماكن الحساسة في جسدها كتقول ليه راني حاملة ههههه يا بنت ناس راه هذا شي ما تفقناش عليه ....لكم تتخيلوا كيفاش تكون الحياة فيما بعد....
كدوز العشاء مع الحباب بضحك و لعب ، كتهز غدا صباحا حقائب كتسافرو تسفيرة عالمية بفلوس لعرس ....و لي كان معول يتعرض يضرب بسطيلة و لحم و من يخرج يقول لك عريس نيفو طويل واحد لوذن عند فحال لل معضوضة ... و عروسة شعرها كرد عندها لفلجة كبر من مغارة هرقل بطنجة...يدهم فيه يا الجنس جيعان ...نديرو ليكم عرس باش نتصور فوق عمارية نعلقها في صالون ...علاش ما نمشيش بفلوس العرس نتصور في احسن جزيرة في اندونسيا او طايلوند ندوز شهر عسل كلو حلوة يا سلام لا كانت لحلوة غوز ....خوي عليها عصير الكوك راه موجود في طايلوند و اندونسيا كيحطوه لك في لفطور وكول و تفكرني ....
ما كاينش هذا شي ... اخي مواطن اختي مواطنة حضي مع ولاد ●●●●●● و بنات ●●●●● راه شحال من واحد عاش قصة حب في الفايس في الاخير لقاها بنت خالتو لي كتخرج حفيانة شعرها عامر حنة ....شحال من وحدة عاشت قصة حب مع خليجي شعر رطب حروفو كحلين في الاخير طلع علال خو شبكشي ....احبكم ....
0 التعليقات: